Gipuzkoako Hondakinen Kontsortzioak (GHK) eta GIBISA enpresak adenda kontratua sinatu dute gaur goizean, Gipuzkoako Ingurumen Gunean (GIG-2) upgrading sistema bat instalatzeko. Urrats estrategiko horri esker, Gipuzkoako hondakin organikoekin sortutako biogasa biometano bihurtu ahal izango da (gas berdea ere esaten zaio), eta zuzenean injektatu ahal izango da gas naturalaren sarean. GHK-ko presidente eta Jasangarritasuneko diputatu José Ignacio Asensio eta Gibisako Gipuzkoako eta Nafarroako ordezkaritzako zuzendari Xabier Zabala izan dira sinaduran.

Proiektu horrekin, Gipuzkoa hondakinak tratatzeko eta balorizatzeko teknika erabilgarri onenen abangoardian dago, eta trantsizio energetikoarekin, efizientziarekin eta deskarbonizazioarekin duen konpromisoa berresten du.

Instalazio berriak 600 Nm³/h-ko upgrading ahalmena izango du, eta biohondakinarekin ekoitzitako biogasaren %50 aprobetxatuko du biometano bihurtzeko; gainerako %50a, berriz, elektrizitate berde bihurtuko da, dauden motorren bidez. Sistema horri esker, %100 berriztagarria den gas berdea injektatu ahal izango zaio banaketa-sareari, eta energia garbia, tokikoa eta berriztagarria emango zaie etxebizitza, enpresa eta industriei.

“Biometanoa etorkizuneko gas berriztagarri nagusietako bat da. Gas berdea da, alternatiba garbi, efiziente eta heldua, energia-sistema ekonomia zirkularretik deskarbonizatzeko aukera ematen diguna. Gipuzkoa da aldaketa horren buru, ekintzen bidez”, azpimarratu du José Ignacio Asensiok.

Ingurumen- eta energia-eragin handiko proiektua

Aukeratutako mintz bidez bereizteko teknologiak ez du ez urik ez berorik behar, eta horrek hobekuntza nabarmena dakar ingurumenari eta energia-eraginkortasunari dagokienez. Upgrading-unitatea 40 oineko edukiontzi batean instalatuko da, GIG-2ren sarrerako zabalgunean, sarearekin konektatzeko puntuaren ondoan. Gainera, kogenerazio-motorrak bizkarralde gisa mantenduko dira, eta horrek aldakortasun handiagoa emango dio lantegiari, eta zuzian erretako gas-bolumena murriztuko du.

Proiektu horren barruan sartzen da, halaber, sistema fotovoltaiko bat instalatzea eta hondakin tekniko berriak tratatzeko egokitzea. Hori guztia Zubietako Ingurumen Gunearen balorizazio materiala eta energetikoa maximizatzeko estrategia integral baten parte da.

Proiektua gauzatzeko epea 12 hilabetekoa da, eta Eusko Jaurlaritzako Ingurumen Sailburuordetzak onartu du.

“Jarduketa horren bidez, hondakin organikoak gas berde bihurtzen ditugu, eta Gipuzkoak puntako lurralde gisa duen eginkizuna indartzen dugu, ekonomia zirkularraren eta justizia klimatikoaren printzipioekin bat datozen irtenbide jasangarrietan”, adierazi du Asensiok.

Biometanoa: energia berriztagarria, moldakorra eta garbia

Biometanoa hondakin organikoetatik sortutako gas berriztagarria da, eta upgrading bezalako teknologiei esker, gas naturalaren propietate berberak lor ditzake. Gas berde hori garraia eta injekta daiteke dauden sareetan, eta elektrizitatea, beroa edo mugikortasun jasangarria sortzeko erabil daiteke, efizientzia-berme handienekin.

Gainera, Estatuko eta Europako arau-esparru berriak, jatorri-bermeen sistema barne hartzen duenak, deskarbonizazioan funtsezko energia-bektore gisa duen eginkizuna indartzen du. Espainiako Gobernuko Trantsizio Ekologikorako Ministerioaren Epe Luzerako Deskarbonizazio Estrategiak trantsizio energetiko bidezko eta jasangarrirako lehentasunezko iturri gisa identifikatzen du.