Eroskik eta Ikerlanek hitzarmen estrategiko bat sinatu dute berrikuntza teknologikoaren aldeko apustua indar-tzeko, elikagaien banaketa-sektorea eraldatzeko funtsezko palanka gisa. Akordioak konponbide aurreratuak garatzea ahalbidetuko du, eraginkortasun operatiboa, segurtasuna eta kontsumitzaileen esperientzia hobetzeko, eta aldi berean gaikuntza teknologikoa eta enpresa-aukera berriak sortzea bultzatuko du.
Datozen lau urteetan, bi erakundeek batera lan egingo dute adimen artifiziala, datuen analitika aurreratua, zibersegurtasuna edo hiperautomatizazioa bezalako eremuetan oinarritutako I+G proiektuetan. Retail sektorea birdefinitzeko eta Eroskiren lehiakortasuna indartzeko potentzial handia duten teknologiak, gero eta ingurune digitalizatuago batean. Hitzarmenak talde mistoak eta lankidetza-gune partekatuak sortzea aurreikusten du, bi erakundeetako profesionalen artean ezagutza transferitzea erraztuz. Halaber, talentu teknologikoa erakartzeko, garatzeko eta espezializatzeko ekimenak biltzen ditu, berrikuntza-proiektuetan, prestakuntza-programetan eta trebakuntza-jardueretan batera parte hartuz. Enrique Monzonis, Eroskiko berrikuntza eta teknologiaren zuzendariak eta Ion Etxeberria Ikerlaneko zuzendariak sinatu dute akordioa.
Saltoki berria Gasteizen
Beste aldetik, Eroskik supermerkatu berri bat inauguratu du Gasteizen. Eroski/City izenekoa da saltokia, eta, bezeroarenganako arreta pertsonalagoa eman ez ezik, apustu indartsua egingo du tokian tokiko produktuen eta sasoiko elikagai freskoen alde 4.000 erreferentzia baino gehiagorekin. Saltokiak lau langile izango ditu.