Ardi eta arkumeen nutrizio beharrak eta barne parasitoen kontrola, arkume jaioberrien gaixotasunak eta animalien ongizatearen kudeaketa dira Europan ardi sektorean diharduten profesionalek partekatzen dituzten kezka nagusietako batzuk.
Sektorean diharduten eragileen beharrak eta esperientziak partekatzea funtsezkoa da ezagutza handiagoa lortzeko eta Europan ardi aziendaren errentagarritasuna bermatuko duten irtenbideak eta praktika onak ezartzeko. Erronka horri aurre egiteko, 2020an Eurosheep sarea sortu zen, ardiei buruzko ezagu-tzak trukatzeko ekimen europarra, sektoreko 1.200 eragileren baino gehiagoren parte hartzearekin, abeltzainak, albaitariak, teknikariak, ikertzaileak eta akademikoak tartean. Emaitzak aurkeztu dira Neiker zentro teknologikoaren egoitzan, Arkauten (Araba), hiru urte eta erdiko ikerketaren ondoren –lehen zatia pandemiak baldintzatuta–.
Proiektuaren esparruan, sare tematiko bat sortu da ardien osasunari eta nutrizioari buruzko ezagutza berritzailearen truke interaktiboa egiteko, parte hartu duten 8 herrialdeetako industria horretako eragile nagusien artean (Frantzia-proiektuaren liderra, Espainia, Italia, Hungaria, Irlanda, Italia, Erresuma Batua eta Turkia). Helburua? Sektorearen produktibitatea eta errentagarritasuna hobetzea lortzea, animalien elikadura eta osasuna hobeto maneiatuz. Proiektuaren barruan, Neikerek zeregin nabarmena izan du sarearen dinamizatzaile gisa Espainian, premien ebaluazioa eta sektoreko profesionalentzat erabilgarri izango diren eta haiek onartuko dituzten irtenbideak bilatuz nazio mailan, eragin handiagoarekin Euskadin, Nafarroan, Gaztela eta Leonen, Gaztela-Mantxan eta Extremaduran. Guztira, maila nazionalean, 11 irtenbide aukeratu eta probatu dira 25 ardi eta arkume artaldetan (zazpi elikadurari buruzkoak eta lau osasunari buruzkoak).