Gipuzkoako 290 ustiategik jaso dute lehen sektorerako Erreskate Planaren onura. Horren bidez, Aldundiak covid-19ak gehien kaltetu dituen azpisektoreei lagundu die, 893.074 euroko zuzeneko laguntzekin: artzaintza, sagardoa, txakolina, nekazalturismoak, lore-mozketa eta zezenketa-ustiategiak. Pandemiaren ondorioz jarduera horiek izan duten diru-sarrera falta arintzea da helburua, jarduera ekonomikoari, enpleguari eta landa-ingurunearen dinamismoari eutsita.
Laguntza horien %36,2 (323.336 euro) ardi (eta ahuntz) azienden ustiategietara bideratu dira, eta azpisektore horrek izan du eskaera-kopuru handiena, zehazki 141 onuradun. Aitzitik, laguntzen %26,6 (237.460 euro) sagardo ekoizleentzat izan dira; zehazki, 52 izan dira onuradunak. Txakolinaren kasuan, 115.405 euro banatu dira 26 ekoizleren artean, laguntzen %12,9. Pandemiak nekazaritza-turismoei ere zuzenean eragin die, eta, beraz, laguntzen %19 azpisektore horrentzat izan dira. Bestalde, landare apaingarrien ustiategiek laguntzen %2,6 jaso dute (23.250 euro), eta bost ustiategi izan dira onuradunak. Azkenik, sei zezen-ustiategik 24.050 euro jaso dituzte, hau da, laguntzen % 2,7.
Jabier Larrañaga Sustapen Ekonomiko, Turismo eta Landa Inguruneko diputatuak adierazi duenez, Aldundiak sektoreko eragileei laguntza eskaintzen jarraituko du aurrera egiteko.